عندما يغيب شخص عزيز يترك بداخل النفس شعورا بألم وفقد كبير لا يغنى عنه أي شخص آخر، لذلك يحاول الشخص البحث عن طرق أخرى يعالج بها آلام شوقه وحنينه كالنظر لصور ومقتنيات الشخص العزيز على قلبه، لذلك فكرت أمل في مساعدة من يفتقد شخصا عزيزا عليه بتحويل ملابسه لقطع يرتديها دبدوب لتصبح ذكرى جميلة تستمر طوال الوقت.
أمل تحول ملابس الأحباب إلى دمى ومخدات
وتحدثت أمل رضا خريجة كلية تمريض جامعة حلوان عن مشروعها، قائلة لـ"اليوم السابع": "كنت بشتغل ممرضة لفترة معينة لكن قررت في مرحلة من حياتي إني أبدأ طريق جديد وأدي مساحة أكبر لشغفي بالفن والحرف اليدوية، لم أدرس تصميم أزياء أو خياطة بشكل أكاديمي وبدأت من الصفر تمامًا، ولم أمتلك خبرة في الباترونات أو صناعة الدباديب لكن كان عندي شغف كبير وإصرار إني أتعلم".
وتابعت "بدأت أبحث وأتعلم وأجرب لحد ما اشتريت أول ماكينة خياطة وبدأت رحلة التعلم والتجربة بإمكانيات بسيطة جدًا ومع الوقت بقيت أطور من نفسي وأتعلم تقنيات جديدة وأضيف لمستي الفنية لكل قطعة بعملها".
وأضافت "مشروعى عبارة عن تحويل الملابس اللي ليها قيمة عاطفية وذكريات خاصة لأصحابها إلى دباديب وقطع هاند ميد زي المخدات والقلوب والبطاطين والفكرة إن قطعة الملابس مش مجرد قماش لكنها ممكن تكون آخر حاجة باقية من شخص عزيز أو ملابس أب أو أم أو زوج أو شخص مسافر وكل قطعة وراها حكاية تستاهل إنها تفضل موجودة".
وعن أسباب تفكير أمل في تنفيذ مشروعها، قالت "الفكرة بدأت من ارتباطي الشديد بالذكريات والمعاني اللي ممكن تكون موجودة في حاجات بسيطة بنحتفظ بيها وخلال فترة شغلي في التمريض اتعاملت مع مرضى وأهالي كتير وشوفت قد إيه الملابس والمقتنيات الشخصية ممكن تكون غالية جدًا على أصحابها خصوصًا لما تكون مرتبطة بحد فقدوه والمواقف دي خلتني أفكر في طريقة نخلي بيها الحاجات دي موجودة في حياتنا بشكل مختلف بدل ما تفضل محفوظة في دولاب أو صندوق ومن هنا بدأت مشروعى لكنها محاولة إني أقدم حاجة ليها معنى إنساني".
وتحدثت أمل عن أكثر القصص الإنسانية التي قابلتها خلال عملها بمشروعها، حيث قالت "من أكتر القصص اللى أثرت فيا جدًا هي قصة سيدة بعتتلي بدلة والدها اللي احتفظت بيها حوالي 40 سنة بعد وفاته وكان والدها متوفي وهي عندها 15 سنة والبدلة كانت بالنسبة لها أكتر من مجرد قطعة ملابس كانت جزء من ذكرياتها علي مدار 40 سنة وهي محتفظة بيها وأنا وقتها اتأثرت جدًا وفضلت أفكر في مسئولية إن حد يسلمني حاجة غالية بالشكل ده ويكون واثق إني هحافظ عليها واللحظة دي خلتني أحس إن قيمة شغلي أكبر بكتير من مجرد منتج بنبيعه وإن كل قطعة بشتغل عليها فيها جزء من حياة إنسان وذكرياته".
وعبرت أمل عن حلمها الذى تسعى لتحقيقه في المستقبل، حيث قالت "نفسي مشروعى يكبر ويوصل لكل بيت وقلب محتاج يحتفظ بذكرى غالية عليه ونفسي يكون عندنا مساحة أكبر نقدر من خلالها نقدم منتجات وأفكار جديدة مرتبطة بالذكريات ونوصل بشغلنا للعالم كله مش بس داخل مصر وكمان نفسي أشجع كل شخص عنده حلم إنه يبدأ حتى لو مش معاه خبرة أو إمكانياته كبيرة لأن تجربتي علمتني إن البداية مش لازم تكون مثالية المهم إننا ناخد أول خطوة وفي النهاية أنا مؤمنة إن النجاح مش إنك تكون عارف تعمل كل حاجة من البداية النجاح إنك تجرب وتتعلم وتكمل".
