كشفت الفنانة ريتال عبد العزيز، عن كواليس أكثر حول علاقتها بالفنانة دنيا سمير غانم خلال مسلسل "عايشة الدور"، مستعيدة ذكرياتها مع المسلسل، قائلة: "مرة دنيا عملت عزومة كبيرة فسيخ ورنجة واتبسطنا جدا والكواليس معها كانت لذيذة وممتعة وحتى لما سافرنا أسوان كانت خايفة عليا وبتاخد بالها منى".
وأضافت "ريتال"، خلال تصريحات خاصة لـ تليفزيون اليوم السابع، عن كواليس العمل مع طاقم مسلسل كتالوج: من ريهام وفراج اتعلمت الصبر والشغل معاهم مريح، أنتى بتاخدي خبرة كبيرة، وفيجو دايما كان بيهزر ويضحكنا".
وكشفت الفنانة ريتال، عن تفاصيل علاقتها الفنية مع دنيا لافتة: أول مرة أشتغل مع دنيا كان بالنسبة لى حلم لأن مسلسل نيللى وشريهان هو اللى خلانى احب التمثيل ، فلما جالى الدور كنت في كواليس فيلم فيها إيه يعني قاعدة في الكرفان وفجأة ماما عملت فيا مقلب وكأنها زعلانة بعدها راحت قالتلى أنى معروض عليا الدور وفرحت جدا".
وتابعت "ريتال"، قائلة: فرحت عشان كان نفسى أمثل مع دنيا ومع المخرج أحمد الجندى وفعلا الكواليس كانت حلوة أوى، دنيا شخصية هادية وملتزمة ومركزة وصبورة واتعلمت منها كتير دا غير انها بتخاف عليا اوى وكانت بتعاملنى كأنى بنتها.
وقد تم تكريم الفنانة ريتال عبد العزيز، في النسخة الـ 13 من مهرجان الشارقة الدولي لسينما الأطفال والشباب، وحصدت جائزة الشباب على أعمالها الفنية، بخلاف ذلك تشارك من ضمن قائمة المحكمين الواعدين "فئة أفلام من صنع الأطفال والناشئة.
