السبت، 21 نوفمبر 2026
بتوقيت القاهرة
عاجل
◆فيلم «البرانية» يفوز بجائزة الهرم البرونزي بمهرجان القاهرة السينمائي◆سيراميكا يعلن حصول مؤمن سليمان على الرخصة التدريبية Pro من الاتحاد الآسيوي◆السولية بعد فوز سيراميكا: 11 سنة وأنا بحلم أرجع ستاد الإسماعيلية◆وزير الشباب والرياضة يتابع حالات الأطفال المصابين في حادث سقوط لعبة “الساقية”◆رئيس الحكومة اللبنانية: لا تراجع أو تهاون في استعادة كامل أراضينا وبسط سلطة الدولة◆حظك اليوم وتوقعات الأبراج السبت 21 نوفمبر على الصعيد المهنى والعاطفى والصحى◆حكايات الولاد والأرض 31.. زوجة الشهيد هاني سليمان: كان بيفتح خريطة مصر ويحبب أولادنا في بلدنا◆مدير عام الأزهر للفتوى يلقي خطبة الجمعة من مركز ومؤسسة أمان بالعاصمة لندن◆ذوو الهمم يزينون آخر فعاليات المهرجان القومي للمسرح المدرسي بـ 3 عروض متميزة◆يوسف رعنة وأحمد حسام الدين خارج منافسات دولة التلاوة◆عمرو أديب: السادات قائد استثنائي غيّر وجه مصر.. وتكريمه في الكونجرس تقدير لمسيرة تاريخية◆فتاوى تشغل الأذهان| حكم الاعتماد على الذكاء الاصطناعي لتحديد اتجاه القبلة.. كيفية معالجة الشك المتكرر في صحة الوضوء والصلاة؟.. وهل الوفاة يوم الجمعة من علامات حسن الخاتمة؟
مقالات

حكايات الولاد والأرض 31.. زوجة الشهيد هاني سليمان: كان بيفتح خريطة مصر ويحبب أولادنا في بلدنا

كل مرة كنت أنا اللي أجري أحضّر له حاجاته وفطاره، وأشربه الشاي بإيدي. كنت سعيدة، وحاسة إنه ابني البكري. أدعي له، وأحصّنه، وأستودعه الله، وهو يضحك بصوت جميل، كأنه أغاني الهنا والجوَى، ويقول لي: «أيوة كده يا ست أمينة…

كل مرة كنت أنا اللي أجري أحضّر له حاجاته وفطاره، وأشربه الشاي بإيدي. كنت سعيدة، وحاسة إنه ابني البكري. أدعي له، وأحصّنه، وأستودعه الله، وهو يضحك بصوت جميل، كأنه أغاني الهنا والجوَى، ويقول لي: «أيوة كده يا ست أمينة، خلتيني سي السيد»، وأنا أقول له: «وأنا أطول تبقى سيدي يا سيدي؟». وعلى طول يمسك إيدي ويبوسها، ويقول لي: «إنتِ اللي ست الكل وتاج راسي، عارفة ليه؟». أسأله: «بعيني من غير كلام؟». يرد بعينه بكلام كتير وكبير وطويل، يخلص عند بوسة على جبيني، ويطبطب على كتفي، ويقول لي: «إنتِ مش أم الولاد دول وبس، إنتِ أبوهم كمان، وإنتِ أمي الصغيرة».

لكن اليوم لم يحدث شيء من كل هذا، وجريت نوران تودعه على السلم، ومن باب البيت جريت بسرعة تلحقه على باب العمارة، وبعتت له بوسة بإيدها الصغيرة، وهو يضحك، وأنا سامعاه. رجلي اتسمرت، وجسمي تلج، ونفسي اضطرب، وقلبي ارتجف، وأنا بقول لكل المشاعر دي: «في إيه؟!»، وأقول لنفسي: «مالك يا سكينة النهارده؟ مش زي كل يوم ليه؟!».

قلبي اللي خاصمته لأنه قدر يصارحني، قال بصوت وجع صدري وكتم نفسي: «في حاجة هتحصل!». وحصلت، وراح قلبي مع اللي حصل.

سكينة حرم الشهيد هاني سليمان هاني، تحكي حكاية شهيدها:

«عقيد أركان حرب هاني محمد محمد سليمان، وُلد في قرية قصاصين الأزهار بمحافظة الشرقية. درس في مدرسة أحمد عرابي الثانوية، ومدرسة قصاصين الأزهار الإعدادية بمركز أولاد صقر. وهو الأخ قبل الأصغر، ولديه ولد وابنة، هما نوران ومحمود؛ نوران في الصف الثالث الثانوي، ومحمود في الصف الأول الثانوي.

كان محبًا لإخوته، وزوجًا مثاليًا، وكان حافظًا للقرآن، وصائمًا دائمًا، وجميع من حوله يشهدون له بالتدين وحفظ القرآن، فكان يختم القرآن كل أربعة أشهر. وكان يعلم الجنود الذين لا يعرفون القراءة والكتابة بعض سور القرآن الكريم. وكانت علاقته بالجنود علاقة الأخ الأكبر بإخوته، وهذا ما علمته من جنوده بعد استشهاده.

وكان متصدقًا على كثير من المحتاجين في القنطرة، محل عمله، وهذا ما لم أكن أعلم به إلا بعد استشهاده. التحق الشهيد بكلية القادة والأركان وهو لا يزال نقيبًا، نظرًا لتميزه وإتقانه للعمل وشغفه بالتفوق، وتخرج في يونيو 2003، وكان من الدفعة 87 حربية.

كانت أحلامه بسيطة جدًا، فلم يتمنَّ لنفسه أي شيء، بل كانت كل أمانيه لبلده أن تكون في أحسن حال، وأن يراها أفضل من أكبر الدول المتقدمة. وكان دائمًا ما يفتح خريطة مصر لنوران، وهي في الصف الرابع الابتدائي، ويطلعها على جمال مصر، ويشرح لها ثرواتها وغناها وحدودها مع الدول الأخرى».

تبكي السيدة زوجها وحبيبها، ثم تكمل حكاية بطلها:

«هاني كان كثير الكلام عن الشهادة، وكنت دائمًا أقوله: ربنا يحفظك إنت واللي معاك، مصر محتاجة رجالتها يا هاني، وإحنا محتاجينك، خَلّي نوران ومحمود دايمًا قدام عينك.

فكان يقول: بالنسبة لمصر، رجالتها ما بتخلصش، إن راح شهيد يتولد ألف شهيد. إحنا مؤمنين بكده، وعارفين إن بلدنا كلها رجالة، ورجالة غيورة عليها كمان، حتى إنتِ وكل اللي زيك رجالة، أيوة رجالة وأحسن كمان.

يا سكينة، كل مقاتل فينا مطمّن إن ضهره متغطي مش مكشوف. آه، متغطي ومحمي كمان، بست بمية راجل. أنا مش خايف على ولادنا من بعدي؛ لأنك معاهم. وأوعى تفتكري إن البلد هتنسى أولاد الشهداء، أبدًا. حتى الراجل البسيط اللي مش عارفكوا هيقف جنبكم، والست المسكينة والشباب وحتى الأولاد الصغيرين بيشيلوا أولاد الشهداء فوق راسهم.

وده اللي مطمّني أنا واللي معايا، إحنا عارفين إن ورانا ستات كل واحدة زي الجبل، الواحد منا يتسند عليها وما يقلقش على اللي وراه، وكمان ورانا مصر وكل المصريين، وده اللي مجمّد قلبنا على الموت وعلى الكفرة الإرهابيين واللي وراهم كمان».

أنا كنت فخورة بكلامه؛ لأني حاساه ومصدقاه. هاني كان راجلًا بمعنى الكلمة، وزوجًا جميلًا، وأبًا حنينًا، ووطنيًا من طراز رفيع، وكان على لسانه دائمًا طلب الشهادة من الله.

وقبل استشهاده بيوم واحد قال: «حد يطول الشهادة؟ ربنا يكتبها لي».

وكان قبل استشهاده بكام يوم أحضر شنطة جلد سوداء، وعرّفني كل المستحقات الخاصة به لو حصله حاجة. وكان موقفًا غريبًا لم يحدث من قبل، فقلت له: «إنت اللي هتخلص كل حاجاتك وأنا مالي؟ ربنا يحفظك يا حبيبي». قال لي: «بعرفك بس علشان تاخدي بالك».

ويوم الاستشهاد، كان عندي الصبح، وكان يوم فض اعتصام ميدان رابعة. وقد تم استدعاؤه قبلها بيوم بالليل، ولما قلت له: «فرح أخوك بعد يومين، اعتذر؛ لأن دي إجازة ليك»، قال لي: «مقدرش، روحي إنتِ والولاد الفرح وأنا هحصلكم».

ولبس بدري وراح يسلم على الولاد. وحاجة غريبة حصلت في اليوم ده؛ البنت نوران أول مرة تصحى وتمسك فيه ومش راضية تسيبه، ونزلت تودعه على السلم، وجريت على البلكونة تشوفه. ومشي وهو عمال يلوّح بإيده لنوران ويبعت لها القبلات والضحكات، وكانت عينه بتلمع أوي، وفرحان جدًا، وصوته سعيد.

آخر واحدة شافته كانت نوران، وأنا أول مرة مقدرتش أروح أودعه، ولا قدرت أستودعه ربنا زي كل مرة. لساني ورجلي كأن حد ماسكهم، ما اتحركتش من الصالة. قلبي كان مقبوض، وكنت حاسة بحاجة غريبة جدًا، مش قادرة أوصفها ولا عارفة معناها إيه، لكن كنت قلقة ومتوترة بشكل غريب جدًا.

وبعدها بساعات سمعت الخبر على التليفزيون، وكمان زملاؤه بلغوني إنه مصاب. قلت لهم: «قولوا الحقيقة، أنا قلبي مش مرتاح، قولوا اللي حصل». ساعتها صدقوا إني جامدة وهستحمل الخبر، فقالوا: «زوجك شهيد».

نطق لساني: «الحمد لله»، وغبت عن الدنيا. شوفت ساعتها شريط حياتي مع هاني لحظة بلحظة، وساعة بساعة، ويوم بيوم. الحياة عدت بسرعة أوي، وما قدرتش أمسك نفسي من البكاء، لكن لساني كان يردد: «إنا لله وإنا إليه راجعون»؛ لأني افتكرت إنه وصاني لما أسمع الخبر لازم أقول كده، ولازم أحتسب علشان أحافظ على أجر الصبر. سمعت كلامه لآخر نفس في حياتي، مش في حياته هو.

أخوه وأهل البلد راحوا المستشفى يستقبلوا الجثمان، وكان نفسي أكون هناك وأشوفه، لكن ما حدش رضي يوديني هناك. فعلًا كنت نفسي أشوفه.

استشهد يوم 14 أغسطس 2013، يوم فض اعتصام رابعة، صباحًا، أثناء ذهابه إلى عمله لتأمين كوبري السلام بالقنطرة، حيث كان يعمل رئيس عمليات إحدى الوحدات المقاتلة.

وعرفت إنه أثناء ذهابه لتأمين كوبري السلام، تم إطلاق النار عليه من قبل إرهابيين. وبعد كده عرفنا إنهم من كتائب القسام، واللي أطلق عليه الرصاص ولد عمره ما يتجاوزش 18 سنة. حسبنا الله ونعم الوكيل.

وكان معاه مجند سائق، تمت إصابته بطلقات في الركبة والبطن. والشهيد وهو على الأرض قال للمجند سامح عبد الرحمن: «اجري إنت يا سامح، الرصاص ده جاي لي أنا، امشي إنت». كان خايف على المجند وبيحاول يحميه لآخر نفس في حياته. كان خايف على اللي حواليه، وكان شايل مسؤوليتهم.

هو ده شريك حياتي، وزوجي، وحبيبي، وأبو أولادي، هو ده البطل شهيد مصر اللي حبها وزرع حبها في قلب أولاده».

وترفع رأسها بفخر وتقول:

«أنا زوجة الشهيد اللي كرّمه ربه بالشهادة، زي ما كان صادقًا في دعائه مع ربه. وقام الرئيس بافتتاح كوبري باسم الشهيد عن طريق الفيديو كونفرانس في الزقازيق، تخليدًا لذكرى الشهيد.

وبفضل سيرة الشهيد، تم اختياري من القيادة السياسية لأكون نائبة في مجلس النواب، لأصبح النائبة سكينة سلامة عن حزب مستقبل وطن.

وأفتخر بأنني حرم الشهيد عقيد أركان حرب هاني محمد سليمان».

WhatsApp Image 2026-11-20 at 5.19.24 PM (1)
WhatsApp Image 2026-11-20 at 5.19.24 PM (2)
WhatsApp Image 2026-11-20 at 5.19.24 PM
WhatsApp Image 2026-11-20 at 5.19.25 PM (1)
WhatsApp Image 2026-11-20 at 5.19.26 PM
WhatsApp Image 2026-11-20 at 5.19.27 PM (1)
WhatsApp Image 2026-11-20 at 5.19.27 PM (2)
WhatsApp Image 2026-11-20 at 5.19.28 PM (2)
WhatsApp Image 2026-11-20 at 5.19.30 PM (1)
WhatsApp Image 2026-11-20 at 5.19.30 PM
المصدر: اليوم السابع

Leave A Reply

لن يتم نشر عنوان بريدك الإلكتروني. الحقول الإلزامية مشار إليها بـ *

Related Posts